3 кастрычніка да вучняў пачатковых класаў у госці завіталі Бураціна, Мальвіна і Артэмон, якія разам з хлопчыкамі і дзяўчынкамі здзейснілі падарожжа па краіне Правілаў дарожнага руху. Конкурсы, гульні, песні і танцы…Усе выпрабаванні вучні з лёгкасцю прайшлі і дапамаглі Бураціне разабрацца з дарожнымі знакамі, пешаходным пераходам і іншымі прамудрасцямі дарогі.
Пад такой назвай прайшло свята першакласнікаў, якія цэлы месяц вучыліся быць школьнікамі: правільна сядзець за партамі, паднімаць руку перад тым, як адказаць на пытанне настаўніка, добра паводзіць сябе не толькі на ўроках, але і на перапынках…Першакласнікі чыталі вершы, спявалі школьныя песні, танцавалі…У госці да іх завіталі Бураціна і Мальвіна, ды завіталі не адны, а з загадкамі, конкурсамі і заданнямі. З усімі «сюрпрызамі» казачных герояў нашы вучні справіліся на «дзесяць!». А значыць, у панядзелак для адзіннаццаці новых вучняў школы пачынаецца новае, цяпер ужо сапраўднае школьнае жыццё, поўнае цікавых прыгод. Поспехаў вам, маленькія вучні!
У чацвёрты чацвер месяца — 27 верасня — старшакласнікі сабраліся на адзіны дзень інфармавання «Школа Актыўнага Грамадзяніна», які быў прысвечаны тэме «Беларусь. Сацыяльна-эканамічныя і грамадска-палітычныя падзеі верасня». Спачатку перад вучнямі з прывітальным словам выступіла намеснік дырэктара па выхаваўчай рабоце Фядотава А.А., якая расказала пра Школу Актыўнага Грамадзяніна, а затым усе разам адправіліся ў падарожжа па падзеях верасня. Дапамогу ў правядзенні першага ШАГа аказалі члены ГА «БРСМ», якія вытсупілі з мультымедыйнай прызэнтацыяй спецыяльных відаў зімовай тэхнікі і спортінвентару.
22 верасня хлопчыкі і дзяўчынкі наведалі школьную суботу, якая была прысвечана сяброўству. Гадзіна зносін «Каго можна назваць сапраўдным сябрам», спартландыя «Гэты сябар мяч», мультурок «Мы выбіраем сяброўства»…Вучні пачатковых класаў у гэтую суботу нанеслі сяброўскі візіт Пружанскаму раённаму Дому рамёстваў. 22 верасня ў многіх краінах свету праводзіцца Сусветны дзень без аўтамабіля! Вучні нашай школы прынялі ўдзел у конкурсе малюнкаў «Разумны транспарт» і сталі ўдзельнікамі акцыі «Свет без аўтамабіля».
У другую суботу верасня сярод вучняў пачатковай школы прайшоў конкурс малюнкаў «Мая малая радзіма», старэйшыя сталі ўдзельнікамі гадзіны зносін «Я нарадзіўся тут» і віктарыны «Што я ведаю пра Радзіму». Пасля ўсе разам сустрэліся на фестывалі мастацтваў «Вялікія таленты малой радзімы», дзе перамогу святкавалі вучань 8 класа Бурчык Цімафей (намінацыя «Інструментальная творчасць»), вучаніца 7 класа Яблонская Хрысціна (намінацыя «Арыгінальны жанр»), вучаніца 5 класа Лаўраш Вікторыя (намінацыя «Дэкаратыўна-прыкладное мастацтва»).
З 10 па 15 верасня вучні школы прынялі ўдзел у мерапрыемствах, якія прайшлі ў рамках Тыдня спорту і здароўя. Спартландыі, спаборніцтвы па футболу і піянерболу, I этап рэспубліканскіх спаборніцтваў па легкай атлетыцы «Шкаліяда», эстафеты… Тыдзень прайшоў насычана, здорава і спартыўна!
На працягу другога тыдня верасня ў школе праходзіў традыцыйны Тыдзень бяспечных паводзін, які адкрылі інфармацыйныя гадзіны “Правілы дарожнага руху. Для каго і навошта”. Пазнавальна-гульнёвая праграма “Я – пешаход”, віктарына “Што я ведаю пра бяспеку”, пазнавальная праграма “Азбука дарожнага руху” і многа іншага, цікавага і бяспечнага чакала навучэнцаў школы на гэтым тыдні.
